ਬੜਾ ਤੰਗ ਹੈ ਦੁਨੀਆ ਤੋਂ, ਮੇਰਾ ਦਿਲ ਜਲ ਰਿਹਾ ਹੈ
ਨਾ ਮੇਰੇ ਸਾਹਮਣੇ ਆ ਤੂੰ ਵੀ ਐਵੇਂ ਸੜ ਜਾਏਂਗਾ
ਏਥੇ ਚਲਦੇ ਨੇ ਮਦਰਸੇ ਜੀ ਮਾਇਆ ਦੇ ਇਸ਼ਾਰੇ ਤੇ
ਤੂੰ ਦੱਸ ਕਿੰਜ ਜੱਗ ਤੋਂ ਵੱਖਰੀ ਪੜ੍ਹਾਈ ਪੜ੍ਹ ਜਾਏਂਗਾ
ਤੇਰੇ ਦੁਸ਼ਮਣ ਤਾਂ ਪੰਜ ਹੀ ਨੇ ਤੇ ਲੜਨਾ ਵੀ ਇਕੱਲਿਆਂ ਏ
ਬੜਾ ਚੰਗਾ ਰਹੇਂਗਾ ਪੰਜਾਂ ਨਾਲ ਜੇ ਲੜ ਜਾਏਂਗਾ
ਦੁਖਾਂ ਦੀ ਇਹ ਨ੍ਹੇਰੀ ਸੱਜਣਾਂ ਚਲਦੀ ਹੀ ਰਹਿਣੀ ਏ
ਜੜਾਂ ਰੱਖ ਡੂੰਗੀਆਂ ਨਹੀ ਤੇ, ਬੇਟੈਮਾਂ ਝੜ ਜਾਏਂਗਾ
ਜਿੰਨਾ ਧਰਤੀ ਤੋਂ ਉੱਤੇ ਹੈ ਓਹ੍ਨਾ ਨੀਵਾਂ ਵੀ ਹੋਣਾ ਸਿੱਖ
ਕਿ ਰੱਖ ਹਿੱਮਤ, ਤੂੰ ਮੂਹਰੇ ਮੌਤ ਦੇ ਵੀ ਖੜ ਜਾਏਂਗਾ
ਬੜੀ ਦੁਨੀਆ ਕਮੀਨੀ ਏ ਤੂੰ ਇਸਤੋਂ ਵਧ ਕੇ ਹੈਂ ਯਾਰਾ
ਕਿ ਹੌਲੀ ਹੌਲੀ ਤੂੰ ਵੀ ਇੱਕ ਦੋ ਵਲ ਤੇ ਫੜ ਜਾਏਂਗਾ
ਤੂੰ ਕਰ ਕੋਸ਼ਿਸ਼, ਕੇ ਚਲਨਾ ਸਿੱਖ ਲਵੇਂ ਕੇਰਾਂ ਹਵਾ ਤੇ
ਕਿ ਇੰਜ ਕਰਦਾ ਰਿਹਾ ਤੇ ਆਸਮਾਂ ਤੇ ਚੜ ਜਾਏਂਗਾ
ਨਾ ਸੁਣ ਤੂੰ ਜੋ ਵੀ ਕਹਿੰਦਾ ਹੈ ਇਹ ਜੈਲੀ ਅਕਲਹੀਣਾ
ਇਹਦੀ ਮੰਨੇਗਾ ਤੇ ਘਰ ਮੌਤ ਦੇ ਤੂੰ ਵੜ ਜਾਏਂਗਾ
No comments:
Post a Comment