Friday, March 25, 2011

ਕਾਫਿਲਾ ਮਦ੍ਮਸ੍ਤ ਜ਼ਿੰਦਗੀ ਦਾ ਵੀ ਚਲਦਾ ਜਾ ਰਿਹੈ

ਕਾਫਿਲਾ ਮਦ੍ਮਸ੍ਤ ਜ਼ਿੰਦਗੀ ਦਾ ਵੀ ਚਲਦਾ ਜਾ ਰਿਹੈ 
ਏ ਚਾਨਣਾ ਸਾਹਾਂ ਦੇ ਸੂਰਜ ਦਾ ਵੀ ਢਲਦਾ ਜਾ ਰਿਹੈ 
ਕਰ ਰਿਹਾ ਹਾਂ ਫਿਰ ਵੀ ਰੋਸ਼ਨ ਬਸਤੀ ਉਸ ਵੀਰਾਨ ਨੂੰ 
ਤਾਂ ਕੀ ਹੋਇਆ ਦਿਲ ਦਾ ਬਾਲਣ ਵੀ ਜੇ ਬਲਦਾ ਜਾ ਰਿਹੈ

ਝੋਂਕੇ ਏ ਠੰਡੀ ਹਵਾ ਦੇ ਵੀ ਨੇ ਸੀਨਾ ਸਾੜਦੇ 

ਪਕੜ ਕੇ ਬਾਂਹ ਤੋ ਮੇਰੇ ਚਾਵਾਂ ਨੂ ਪਏ ਨੇ ਤਾੜਦੇ 
ਦਿਸ ਰਹੀ ਹੋਵੇਗੀ ਚਿਹਰੇ ਮੇਰੇ ਤੇ ਹਾਸੀ ਮਗਰ 
ਅਥਰੂ ਮੇਰਾ ਗਮ ਦੇ ਸਾਗਰ ਵਿਚ ਵੀ ਰਲਦਾ ਜਾ ਰਿਹੈ
 

ਚੰਦਰੇ ਬੜੇ ਨੇ ਹਾਦਸੇ ਮੋਹਲਤ ਨੀ ਦਿੰਦੇ ਰੋਣ ਦੀ
ਆਦਤ ਪਈ ਅਣਹੋਣੀ ਨੂ ਵੀ ਸਿਰ ਮੇਰੇ ਤੇ ਹੋਣ ਦੀ
ਕੀ ਨਬਜ਼ ਫੜ ਕੇ ਦੇਖਦੈਂ ਐਦਾਂ ਪਤਾ ਨੀ ਲੱਗਣਾ
ਏ ਅੰਦਰੋ ਅਂਦਰੀ ਰੂਹ ਮੇਰੀ ਵਿਚ ਰੋਗ ਪਲਦਾ ਜਾ ਰਿਹੈ

ਕਿਨੇ ਕੁ ਤਰਲੇ ਕਰਾਂ, ਕਰ ਕਰ ਕੇ ਹਥ ਵੀ ਘਸ ਗਏ 

ਹੈ ਬੜਾ ਸੰਗਦਿਲ ਸਨਮ, ਹਾਸੇ ਵੀ ਜਾਂਦੇ ਦੱਸ ਗਏ 
ਕੁਜ ਵੀ ਨਾ ਮਿਲਿਆ ਬੜਾ ਸੀ ਜੋਰ ਲਾ ਕੇ ਵੇਖਿਆ 
ਵੇਖ ਲੌ ਪਰਗਟ ਵੀ ਆਖਿਰ ਹਥ ਮਲਦਾ ਜਾ ਰਿਹੈ

Friday, March 18, 2011

ਆਜਾ ਸੰਘਣਾ ਪਿਆਰਾਂ ਵਾਲਾ ਰੰਗ ਡੋਲ ਲੈ

ਹੋਲੀ ਜਹੇ ਹਾਲਾਤ, ਰੰਗ ਰੰਗੇ ਜਜ਼ਬਾਤ
ਲੈ ਖਿਆਲਾਂ ਦੀ ਪਰਾਤ, ਵਿਚ ਰੰਗ ਘੋਲ ਲੈ
ਥੋੜਾ ਮੇਰੇ ਉੱਤੇ ਸੁੱਟ, ਥੋੜਾ ਪਾ ਲੈ ਆਪਣੇ ਤੇ
ਆਜਾ ਸੰਘਣਾ ਪਿਆਰਾਂ ਵਾਲਾ ਰੰਗ ਡੋਲ ਲੈ

ਹੋਇਆ ਸੁਰਖ਼ ਗੁਲਾਬੀ ਰੰਗ ਸੰਗ ਨਾਲ ਨੀ
ਦੇਖ ਖੇਡਦੀ ਹਵਾ ਵੀ ਤੇਰੇ ਰੰਗ ਨਾਲ ਨੀ
ਕਾਹਤੋਂ ਬੈਠੀ ਚੁਪ ਚੁਪ ਕੁਜ ਤੂੰ ਵੀ ਬੋਲ ਲੈ
ਆਜਾ ਸੰਘਣਾ ਪਿਆਰਾਂ ਵਾਲਾ ਰੰਗ ਡੋਲ ਲੈ

ਦੇਖ ਹਾਸੇ ਤੇਰਾ ਰਸਤਾ ਪਏ ਨੇ ਤੱਕਦੇ
ਭੌਰੇ ਚੁਣ ਚੁਣ ਫੁੱਲ ਪੈਰਾਂ ਥੱਲੇ ਰਖਦੇ
ਜਿਹੜੀ ਬੰਨੀ ਆ ਉਦਾਸੀ ਵਾਲੀ ਗਂਡ ਖੋਲ ਲੈ
ਆਜਾ ਸੰਘਣਾ ਪਿਆਰਾਂ ਵਾਲਾ ਰੰਗ ਡੋਲ ਲੈ

ਵੇਖ ਆਸਾਂ ਵਾਲੇ ਵਿਹੜੇ ਚ ਗੁਲਾਲ ਉੱਡਦੇ ਨੂ
ਤੇਰੇ ਨੱਚਦੀ ਦੇ ਵੇਖ ਨਾਲ ਨਾਲ ਉੱਡਦੇ ਨੂ
ਜ਼ੈਲਦਾਰ ਦੀ ਤੂ ਗੱਲ ਇੱਕ ਵਾਰ ਗੌਲ
ਲੈ
ਆਜਾ ਸੰਘਣਾ ਪਿਆਰਾਂ ਵਾਲਾ ਰੰਗ ਡੋਲ ਲੈ

Sunday, March 6, 2011

ਸਜ਼ਾ ਹੋਵੇ.

ਮੈਂ ਚਾਹੁਣਾ ਹਾਂ, ਕੇ ਅੱਜ ਹੀ, ਜ਼ਿੰਦਗੀ ਦਾ ਫੈਸਲਾ ਹੋਵੇ
ਬੜੇ ਮੈਂ ਜੁਰਮ ਕੀਤੇ ਨੇ, ਮੈਂ ਮੁਲਜ੍ਮ ਹਾਂ, ਸਜ਼ਾ ਹੋਵੇ.


ਤੁਸੀ ਦੇ ਦੇ ਤਸੀਹੇ, ਰੂਹ ਮੇਰੀ ਨੂ, ਮਾਰ ਹੀ ਛੱਡੋ
ਸਪੁਰ੍ਦ-ਏ-ਖਾਕ ਕਰ੍ਦੋ, ਕੇ ,ਖੁਦਾ ਦਾ ਵਾਸ੍ਤਾ ਹੋਵੇ

ਨਾ ਮੇਰੀ ਸਾਡ਼ਨਾ ਅਰਥੀ, ਨਾ ਕਰਨਾ ਕਬਰਸਰ ਮੈਨੂ
ਕੇ ਐਨੀ ਦੂਰ ਸੁੱਟੋ, ਰੂਹ ਵੀ ਜਿਥੇ, ਲਾਪਤਾ ਹੋਵੇ

ਜਿੰਨਾ ਚਿਰ ਹੋਰ ਜੀਵਂਗਾ, ਮੈਂ ਕਰਨੇ, ਜੁਰ੍ਮ ਹੀ ਤੇ ਨੇ
ਨਾ ਮੇਰੇ ਤੇ ਤਰਸ ਖਾਓ, ਨਾ ਮੇਰੇ ਤੇ ਦਇਆ ਹੋਵੇ


ਮੈਂ ਹਓਮੈ ਦਾ ਮੁੱਜਸਮਾ ਹਾਂ, ਮੈਂ ਗਠ੍ੜੀ ਪਾਪ ਵਾਲੀ ਹਾਂ
ਕੇ "ਮੈਂ" ਨੂ ਲਾ ਦਵੋ ਫਾਹੇ, ਮਨੁਖ੍ਤਾ ਦਾ ਭਲਾ ਹੋਵੇ


ਮੇਰੀ ਤਸਵੀਰ ਉੱਤੇ, ਹਾਰ, ਮੇਰੀ "ਮੈਂ" ਦਾ ਹੀ ਪਾ ਕੇ
ਤੇ ਟੰਗਣਾ ਉਸ ਜਗਾਹ ਜਿਥੇ ਜਮਾਨਾ ਵੇਖਦਾ ਹੋਵੇ 

ਕੇ ਓਹਨੂ ਜੱਮਨ ਤੋ ਪਹਿਲਾਂ ਹੀ, ਕਰ ਦੇਣਾ, ਦਫਨ ਯਾਰੋ
ਕਿਤੇ ਕੋਈ ਜ਼ੈਲਦਾਰ,ਪੈਦਾ ਜੇ ਹੁੰਦਾ, ਦਿਸ ਰਿਹਾ ਹੋਵੇ