ਪਿੰਡਾਂ ਵਿੱਚ ਮਨਾਈ ਲੋਹੜੀ

ਪਿੰਡਾਂ ਵਿੱਚ ਮਨਾਈ ਲੋਹੜੀ
ਲੱਕੜਾਂ ਦੇ ਨਾਲ ਪਾਥੀਆਂ ਦੇ ਨਾਲ
ਅੱਗ ਦੁਆਲੇ ਗੱਲਾਂ ਕਰਦੇ
ਕੱਠੇ ਹੋਕੇ ਸਾਥੀਆਂ ਦੇ ਨਾਲ

ਸ਼ਹਿਰੀ ਮੈਸੇਜ ਭੇਜ ਰਹੇ ਨੇ
ਲੈਪਟੋਪ ਨੂ ਰੱਖ ਲੈਪ ਤੇ
ਫੇਸਬੁੱਕ ਤੇ ਵੀਚੈਟ ਤੇ
ਜੀਮੇਲ ਤੇ ਵਟਸੈਪ ਤੇ

ਪਿੰਡਾਂ ਦੇ ਵਿੱਚ ਧੂਣੀ ਬਲਦੀ
ਸ਼ਹਿਰੀਂ ਬਲਦੇ ਹੀਟਰ ਜੀ
ਪਿੰਡਾਂ ਦੇ ਵਿੱਚ ਸੱਦੇ ਘੱਲਦੇ
ਸ਼ਹਿਰਾਂ ਵਿਚ ਟਵਿੱਟਰ ਜੀ

ਸ਼ਹਿਰਾਂ ਵਿੱਚ ਪਤੰਗਾ ਉੱਡਣ
ਪਿੰਡਾਂ ਦੇ ਵਿੱਚ ਰੇਤਾ ਜੀ
ਜਿਸਨੇ ਕਰਨ ਦਿਹਾੜੀ ਜਾਣਾ
ਕੀ ਲੋਹੜੀ ਦਾ ਚੇਤਾ ਜੀ

ਕਿਦਰੇ ਲੋਹੜੀ ਲੱਖ ਕਰੋੜੀ
ਹੁੰਦੀ ਧੀਆਂ ਪੁੱਤਾਂ ਦੀ
ਕਿਸੇ ਗਰੀਬ ਦੀ ਧੀ ਨੂ ਕਿਦਰੇ
ਰਬੜ ਨੀ ਲਬਦੀ ਗੁੱਤਾਂ ਦੀ

ਇੱਕ ਲੋਹੜੀ ਜੋ ਅੱਗ ਦੁਆਲੇ
ਹੱਸਦੀ ਨੱਚਦੀ ਗੌਂਦੀ ਏ
ਇੱਕ ਜਿਹੜੀ ਅੱਗ ਬੁੱਝਣ ਮਗਰੋਂ
ਦਾਣੇ ਚੁੱਕਣ ਔਂਦੀ ਏ

ਇਸ ਲੋਹੜੀ ਆ ਜੈਲਦਾਰ ਵੇ
ਸੁੱਖ ਮੰਗ ਲਈਏ ਜੱਟਾਂ ਦੀ
ਕੱਮੀਆਂ , ਸੀਰੀਆਂ, ਹਾਲੀਆਂ ਦੀ ਤੇ
ਖੇਤਾਂ, ਪਹੀਆਂ, ਵੱਟਾਂ ਦੀ