ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਪਾਤਾ ਕਾਨਵੇਂਟ ਚ ਪੜ੍ਹਾਈ ਵਧੀਆ
ਖੇਲ ਕੂਦ ਦੀ ਵੀ ਸਿਖਲਾਈ ਵਧੀਆ
ਜ਼ਰਾ ਬਾਤ ਕੋਈ ਪੰਜਾਬ ਦੀ ਸੁਣਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਏਥੇ ਬੋਲਦੇ ਗ੍ਰੇਜੀ ਸਾਰੇ ਵੇਰੀ ਲਾਉਡ ਐ
ਜੇ ਮੈਂ ਬੋਲਾਂ ਪੰਜਾਬੀ ਕਹਿੰਦੇ ਨਾਟ ਅਲਾਉਡ ਐ
ਥੋੜਾ ਤਰਸ ਤੇ ਮੇਰੇ ਉੱਤੇ ਖਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਮੇਰਾ ਨਾਮ ਕਿਓਂ ਹਰਿੰਦਰ ਤੋ ਹੈਰੀ ਕਰਤਾ
ਮੇਰਾ ਵਿਰਸਾ ਹੀ ਕਾਹਤੋਂ ਮੇਰਾ ਵੈਰੀ ਕਰਤਾ
ਮੇਰੀ ਆਤਮਾ ਨੂ ਮਰ੍ਨੋ ਬਚਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਏ ਮੈਂ ਜਾਣਦਾਂ ਕੇ ਏ ਬੀ ਸੀ ਡੀ ਪੜ੍ਹਨੀ ਜਰੂਰੀ
ਪਰ ਭੁੱਲਾਂ ਮੈਂ ਪੰਜਾਬੀ ਐਸੀ ਕਿਹੜੀ ਮਜਬੂਰੀ
ਐਡਾ ਵੱਡਾ ਮੈਂਥੋਂ ਪਾਪ ਨਾ ਕਰਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਰਹਿੰਦੇ ਸਾਰਾ ਦਿਨ ਘਰ ਵੀ ਗ੍ਰੇਜੀ ਬੋਲਦੇ
ਪੱਤ ਪਾਕ ਜਹੀ ਪੰਜਾਬੀ ਦੀ ਪੈਰਾਂ ਚ ਰੋਲ੍ਦੇ
ਗਿਆ ਵਿਰਸਾ ਗੁਆਚ ਦੱਸ ਪਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ


ਮੇਰੇ ਪਿੰਡਾਂ ਵਾਲੇ ਆੜੀ ਨੇ ਮੇਰੇ ਤੇ ਹੱਸਦੇ
ਨਿੱਤ ਨਵੀਆਂ ਅਖਾਣਾਂ ਮੈਨੂ ਆਣ ਦਸਦੇ
ਇੱਕ ਦਾ ਤਾਂ ਮਤਲਬ ਸਮਝਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਝੋਨਾ, ਕਣਕ, ਪ੍ਰਾਲੀ ਅਤੇ ਖਾਦ ਕਿਹ੍ਨੁ ਕਹਿੰਦੇ
ਗੋਹੇ, ਪਾਥੀਆਂ ਤੇ ਡੈਡੀ ਜੀ ਕਮਾਦ ਕਿਹ੍ਨੁ ਕਹਿੰਦੇ
ਉੜੇ ਆੜੇ ਦੀ ਪਛਾਣ ਤਾਂ ਕਰਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਹੋਊ ਫੇਰ ਕਿ ਜੇ ਸਬ ਪੇਂਡੂ ਕਹਿ ਬੁਲੌਣਗੇ
ਪੇਂਡੂਆਂ ਦੇ ਜਾਏ ਹੀ ਤਾਂ ਪੇਂਡੂ ਅਖਵਾਉਣਗੇ
ਮੈਨੂ ਧੱਕੇ ਨਾਲ ਸਹਿਰੀ ਨਾ ਬਣਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਮੈਂ ਵੀ ਵੱਡਾ ਹੋਕੇ ਲਿਖੂੰਗਾ ਪੰਜਾਬੀ ਵਿਚ ਗੀਤ
ਵੇਖੋ ਨੈਨੇਵਾਲ ਵਾਲਾ ਜਿੱਦਾਂ ਲਿਖੇ ਪ੍ਰੇਮਜੀਤ
ਏਹੋ ਰੀਝ ਮੇਰੇ ਦਿਲ ਦੀ ਪੁਗਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ

ਮੈਨੂ ਦੇ ਦਿਓ ਲਿਆ ਕੇ ਜੀ "ਮਾਂ ਬੋਲੀ" ਵਾਲਾ ਕੈਦਾ
ਏ ਬੀ ਸੀ ਡੀ ਵਿਚ ਦਿਸ੍ਦਾ ਨੀ ਬਹੁਤਾ ਮੈਨੂ ਫੈਦਾ
ਮੰਗ ਜ਼ੈਲਦਾਰ ਦੀ ਨਾ ਠੁਕਰਾਯੋ ਡੈਡੀ ਜੀ
ਮੈਨੂ ਥੋੜੀ ਜਹੀ ਪੰਜਾਬੀ ਤਾਂ ਸਖਾਯੋ ਡੈਡੀ ਜੀ