ਉਮਰ ਗੁਜ਼ਰ ਜਾਊ ਲੱਗਦੈ ਸਿਰ ਤੋਂ ਕਰਜ਼ ਉਤਾਰਨ ਨੂੰ

ਮੈਂ ਲਿਆ ਲੋਨ ਤੇ ਐਸ਼ਰ ਸੀ
ਫਿਰ ਪਾਇਆ ਬੈਂਕ ਪਰੈਸ਼ਰ ਸੀ
ਮੈਨੂ ਵੇਚਣਾ ਪਿਆ ਥਰੈਸ਼ਰ ਸੀ ਓਹਦੀ ਕਿਸ਼ਤਾਂ ਤਾਰਨ ਨੂੰ
ਉਮਰ ਗੁਜ਼ਰ ਜਾਊ ਲੱਗਦੈ ਸਿਰ ਤੋਂ ਕਰਜ਼ ਉਤਾਰਨ ਨੂੰ

ਪਹਿਲਾਂ ਗਹਿਣੇ ਰੱਖੇ ਗਹਿਣੇ ਸੀ
ਓਹ ਵੀ ਤਾਂ ਰੱਖਣੇ ਈ ਪੈਣੇ ਸੀ
ਕੁਜ ਖਾਦ ਦੇ ਕੱਟੇ ਲੈਣੇ ਸੀ ਮੈਂ ਖੇਤ ਖਿਲਾਰਨ ਣੂੰ
ਉਮਰ ਗੁਜ਼ਰ ਜਾਊ ਲੱਗਦੈ ਸਿਰ ਤੋਂ ਕਰਜ਼ ਉਤਾਰਨ ਨੂੰ

ਹੋਇਆ ਸਿਰ ਤੇ ਕਰਜ਼ਾ ਬਾਹਲਾ
ਅੱਖਾਂ ਕੱਡਦਾ ਰਹਿੰਦਾ ਲਾਲਾ
ਬੈਂਕ ਮਨੇਜਰ ਰਹਿੰਦੈ ਕਾਹਲ਼ਾ ਮੈਨੂ ਧੱਕੇ ਮਾਰਨ ਨੂੰ
ਉਮਰ ਗੁਜ਼ਰ ਜਾਊ ਲੱਗਦੈ ਸਿਰ ਤੋਂ ਕਰਜ਼ ਉਤਾਰਨ ਨੂੰ

ਹੋਗੇ ਹੋਰ ਹਾਲਾਤ ਭਿਆਨਕ
ਸੋਕਾ ਪੈ ਗਿਆ ਫੇਰ ਅਚਾਨਕ
ਕਿਦਰੋਂ ਆਜੇ ਬਾਬਾ ਨਾਨਕ ਮੇਰੀ ਮੱਜੀਆਂ ਚਾਰਨ ਨੂੰ
ਉਮਰ ਗੁਜ਼ਰ ਜਾਊ ਲੱਗਦੈ ਸਿਰ ਤੋਂ ਕਰਜ਼ ਉਤਾਰਨ ਨੂੰ

ਹੋ ਗਿਆ ਰੋਟੀ ਟੁੱਕਰ ਔਖਾ
ਦੇ ਗਈ ਹਾੜ੍ਹੀ ਵੀ ਫਿਰ ਧੋਖਾ
ਰੋਂਦਾ ਪੱਠਿਆਂ ਬਾਜੋਂ ਟੋਕਾ ਕੋਈ ਲੱਬੋ ਕਾਰਨ ਨੂੰ
ਉਮਰ ਗੁਜ਼ਰ ਜਾਊ ਲੱਗਦੈ ਸਿਰ ਤੋਂ ਕਰਜ਼ ਉਤਾਰਨ ਨੂੰ

ਰਹਿਗੇ ਹੱਥ ਵਿੱਚ ਕੱਮ ਨਾ ਧੰਦੇ
ਅੱਕ ਕੇ ਦੁੱਖ ਤੋਂ ਲੌਂਦੇ ਫੰਦੇ
ਦੱਸ ਉਂਜ ਜੈਲਦਾਰ ਕਿਸ ਬੰਦੇ ਦਾ ਦਿਲ ਕਰਦੈ ਹਾਰਨ ਨੂੰ
ਉਮਰ ਗੁਜ਼ਰ ਜਾਊ ਲੱਗਦੈ ਸਿਰ ਤੋਂ ਕਰਜ਼ ਉਤਾਰਨ ਨੂੰ